Thaçi shkruan për kombëtaren: Ndeshja me Anglinë solli në vëmendjen e tërë botës atë se çfarë është Kosova

4 javë më parë

Thaçi shkruan për kombëtaren: Ndeshja me Anglinë solli në vëmendjen e tërë botës atë se çfarë është Kosova

Presidenti i Kosovës Hashim Thaçi, i ka falënderuar futbollistët e Kosovës për paraqitjen e mrekullueshme në kampanjes kualifikuese për Kampionatin Evropian “Euro 2020”.

Thaçi tha se i gjithë populli i Kosovës është krenar me këta djelmosha, të cilët ia zbardhën fytyrën dhe e promovuan si është më së miri vendin tonë, transmeton AktivPress.

Postimi i plotë:

Tash kur janë qetësuar emocionet për ndeshjet e Kombëtares së Kosovës dhe e shikojmë tërë udhëtimin e ekipit tonë të shkëlqyer, ajo që mbetet është krenaria me lojtarët, me tifozët, me trajnerin dhe stafin e tij.

Ndeshja kundër Anglisë nuk e solli rezultatin e dëshiruar në fushën e gjelbër, por solli në vëmendjen e tërë botës atë se çfarë është Kosova, një shtet i ri me potencial të madh dhe një shoqëri që përkundër traumave të luftës dhe gjenocidit udhëhiqet me vlerat e mikpritjes dhe respektit, barazisë dhe vëllazërisë.

Kosova dhe populli ynë janë mirënjohës për mbështetjen që kemi marrë në kohët më të vështira dhe këtë po e kthejnë me miqësi të përhershme dhe me besim edhe më të fortë në vlerat e veta. Krenar me Kosovën. HTH”