Shkaku i pandemisë, bie numri i ndërmarrjeve të reja të regjistruara në Kosovë

2 muaj më parë

Shkaku i pandemisë, bie numri i ndërmarrjeve të reja të regjistruara në Kosovë

Pasiguria e krijuar pas shpërthimit të pandemisë ndikoi në rënien e ndërmarrjeve të reja të regjistruara gjatë muajve mars-qershor. Gjatë kësaj periudhe, janë regjistruar vetëm 2 mijë e 33 ndërmarrje apo 23.4 për qind më pak sesa në periudhën e njëjtë të vitit paraprak.

Sipas të dhënave të Agjencisë së Statistikave, rënie të regjistrimit të ndërmarrjeve të reja prej -12.3 për qind ka pasur edhe krahasuar me tremujorin e parë të këtij viti.

Kjo rënie sipas përfaqësuesve të bizneseve është e pritshme, pasi siç thonë, pandemia ka shkaktuar çrregullime në shumë sektorë dhe industri. Por, kryetari i Odës Ekonomike Amerikane të Kosovës, Arian Zeka, tha se dallimi prej vetëm -12.3 për qind krahasuar me tremujorin e parë dëshmon besim të lartë, pavarësisht ndikimit negativ që pandemia ka pasur në sektorin privat, raporton KOHA.

“Pandemia ka shkaktuar çrregullime në shumë sektorë dhe industri, duke vështirësuar mbijetesën e shumë ndërmarrjeve ekzistuese, megjithatë në çrregullim krijohen edhe mundësi të reja për biznese, sidomos ato nga sektori i teknologjisë së informacionit dhe komunikimeve. Pandemia covid-19 ka krijuar një hapësirë të re për prodhuesit vendorë, por edhe rrethana nxitëse për transformimin digjital. Kjo rrit nevojën që edhe fondet përkrahëse të Qeverisë, institucioneve ndërkombëtare dhe financiare dhe organizatave donatore të fokusohen në këto industri”, ka thënë Arian Zeka, kryetar i Odës Ekonomike Amerikane të Kosovës.

Ndërkohë, kryetari i Odës Ekonomike të Kosovës, Berat Rukiqi, ka ngritur dyshime se shumë ndërmarrje janë krijuar në këtë kohë edhe për të përfituar nga përkrahja e mundshme e shtetit.

“Pandemia ka pasur ndikim negativ në të gjithë sektorët e ekonomisë dhe dinamikën e ekonomisë, përfshirë edhe aktivitetin ndërmarrës dhe investiv. Çdo vit Kosova ka pasur trend në rritje të regjistrimit të ndërmarrjeve të reja. Ky është viti i parë që ka këtë trend negativ në raport me krijimin e ndërmarrjeve të reja. Kjo do të ndikojë negativisht edhe në krijimin e vendeve të reja të punës”, ka thënë Berat Rukiqi, kryetar i Odës Ekonomike të Kosovës.

Të dhënat e ASK-së tregojnë se aktivitetet ekonomike më të preferuarat gjatë tremujorit të dytë ishin tregtia me shumicë dhe pakicë, ndërtimtaria dhe prodhimi.

Pandemia ndikoi në ekonominë e brishtë të Kosovës. Pasojat janë ndier kryesisht në ndërmarrjet e vogla dhe të mesme, veçanërisht në sektorin e gastronomisë dhe pasuritë e patundshme. Pasoja ka edhe në rënien e fuqisë blerëse të qytetarëve.