Osmani s’përgjigjet nëse do të mbetet në krye të Kuvendit

1 muaj më parë

Osmani s’përgjigjet nëse do të mbetet në krye të Kuvendit

Vetëvendosje mund të mbetet pa asnjë post të lartë institucional, ani pse doli partia e parë në zgjedhjet e 6 tetorit.

Pavarësisht nëse votohet Qeveria e re me Avdullah Hotin kryeministër, kjo parti nuk e ka në plan t’ia kërkojë dorëheqjen kryeparlamentares Vjosa Osmani.

Nënkryetarja e Kuvendit nga Vetëvendosje, Arbërie Nagavci, thotë se kjo nuk është diskutuar fare në parti edhe për faktin e bashkëpunimit tejet të mirë me Osmanin.

KOHA ka pyetur edhe Kabinetin e kryetares së Kuvendit, por ata nuk kanë kthyer përgjigje në atë se cili do të jetë qëndrimi i Osmanit, se a do të mbetet apo jo në këtë post.

Monitoruesi i punës së Kuvendit, Albert Krasniqi, thotë se në rast të dorëheqjes së Vjosa Osmanit mund të bllokohet puna e Legjislativit, raporton KOHA.

Sipas Krasniqit, zgjedhja e kryetarit apo kryetares së re do të jetë e vështirë pasi Vetëvendosje, që e ka të drejtën e propozimit, e ka humbur shumicën në Kuvend.

Vjosa Osmani ishte zgjedhur kryetare e Kuvendit pasi ishte propozuar për këtë post nga Vetëvendosje, pas marrëveshjes për bashkëqeverisje që kjo parti kishte arritur me LDK-në.

Këto dy parti ndanë rrugët në Qeveri, pasi LDK-ja inicioi mocionin për rrëzimin e Qeverisë së udhëhequr nga Albin Kurti më 25 mars.