Mikut të presidentit Thaçi i vazhdohet kontrata për antenë të Telekomit

3 muaj më parë

Mikut të presidentit Thaçi i vazhdohet kontrata për antenë të Telekomit

Përveç pagës së majme që merr në KOSST, Besim Gërxhaliu, vëlla i Zonjës së parë, Lumnije Thaçi, ka siguruar të hyra edhe nga Telekomi, për disa vjet në të ardhmen.

KTV-ja raportoi muajin e kaluar se në pronën e tij, në fshatin Studime e Ulët e Vushtrrisë, ishte vendosur një prej 550 antenave për shpërndarje të rrjetit nga Telekomi.

Kohavisioni ka kuptuar se për një shërbim të tillë, Gërxhaliu është kompensuar me 250 euro në muaj.

Në vitin 2017 atij iu vazhdua kontrata edhe për 5 vjet, por së fundi po paguhet 50 euro më pak.

“Kontrata e qirasë është vazhduar nga data 01.05.2017, me afat kohor 5 vjet, pra deri më 30.04.2022 . Pagesa mujore momentale e qirasë është 200 euro bruto, ndërsa deri më 31.03.2019, pagesa mujore ka qenë 250 euro bruto”, ka thënë Arsim Bilalli, zëdhënës në Telekom.

Sipas Bilallit, çmimi i qirasë përcaktohet në bazë të zonës dhe mbulueshmërisë që përfshijnë antenat.

KTV-ja ka kontaktuar me Gërxhaliun, në numrin e tij të zyrës në KOSTT, por i njëjti nuk ka dashur të flasë me arsyetimin se ka një mbledhje, ndërkaq më vonë nuk është përgjigjur fare në telefon.

Bazuar në formularin e deklarimit të pasurisë, Besim Gërxhaliu, i cili është drejtor i Departamentit të Transmisionit në KOSST, ka të punësuar edhe gruan në Telekom, në degën në Vushtrri.

Nga viti 2009, prej kur është vendosur antena në pronën e tij, Gërxhaliu, në këmbim, nga Telekomi ka marrë mbi 30 mijë euro.

KTV-ja raportoi se antena të Telekomit kishte edhe në pronën e vëllait të presidentit Hashim Thaçi, e gjithashtu në pronën e vëllait të ish-kryeministrit Agim Çeku.