Kastrati ndërron ekipin në Norvegji, bën hap të rëndësishëm në karrierë

4 javë më parë

Kastrati ndërron ekipin në Norvegji, bën hap të rëndësishëm në karrierë

Hendbollistja e Kombëtares së Kosovës, Veronika Kastrati, ka bërë hap të rëndësishëm në karrierën e saj. 18-vjeçarja i është bashkuar klubit norvegjez Raelingen, të njohur për zhvillimin e lojtareve të reja.

Veronika është larguar nga klubi Ellingsrud, ku ishte prej fillimit të karrierës, prej moshës 9-vjeçare.

“Unë kam filluar të luaj hendboll qysh në moshën 9-vjeçare në Ellingsrud IF. Kam luajtur aty me vajzat e lindura në vitin 2001. Si 16-vjeçare kam luajtur për senioret në ligën e tretë të Norvegjisë. Deri më tani, isha në të njëjtin klub. Kam marrë pjesë në shumë tubime të reprezentacionit regjional të grupmoshave U18 e U20 dhe në shumë tubime të talenteve të Norvegjisë”, ka thënë Veronika për faqen zyrtare të FHK-së.

Ajo tashmë është te skuadra Raelingen, ku shpreson se do të bëjë hapa të rëndësishëm në karrierë. Synim e ka të depërtojë në ekipin e parë të klubit, që garon në elitën norvegjeze. Norvegjia e ka shumë të zhvilluar hendbollin e femrave.

“Jam shumë e kënaqur me përzgjedhjen e ekipit. Kam pasur shumë oferta nga klube të tjera, por kam vendosur për Raelingen, që është klub i mirë, ka trajnerë dhe staf shumë profesional. Ekipi U20, ku do të luaj fillimisht, garon në kategorinë e dytë të Norvegjisë. Por, nëse rezultatet sportive tregohen të mira, qëllimi im dhe i klubit është që të bëhem pjesë e ekipit elitar që garon në elitën e Norvegjisë”, ka thënë Veronika për FHK.

Ajo tashmë ndien se ka bërë përparim të madh në ekipin e ri. Ka treguar se çdo ushtrim në këtë klub incizohet dhe analizohet nga trajnerët. Më pas ata japin këshilla për përmirësimet që duhet të bëhen. Veronika ushtron pesë herë në javë me skuadrën, por zhvillon edhe seanca individuale.

Veronika prej vitit 2018 është pjesë e Kosovës. Tashmë ka debutuar edhe me Kombëtaren A, kurse ka luajtur edhe për ekipin U19 në Lituani. Ishte pjesë edhe e udhëtimit të famshëm për në Kovilovo të Serbisë me Kombëtaren U20.