Hoti pjesë e Samitit të ministrave të Financave nga rajoni

2 vite më parë

Hoti pjesë e Samitit të ministrave të Financave nga rajoni

Ministri i Financave Avdullah Hoti, po qëndron në vizitë zyrtare në Mal të Zi, ku po merr pjesë në Samitin e Ministrave të Financave, Guvernatorëve të Bankave Qendrore, si dhe Drejtorëve të Administratave Tatimore të Rajonit, me temën “Stabiliteti financiar rajonal në mjedisin global“, që po mbahet në Beçiq të Malit të Zi.

Në panelin e Ministrave të Financave të rajonit, me temën: Prioritetet e reja – Rritja më e shpejtë ekonomike me financa të shëndetshme publike dhe borxh më të ulët publik,Hoti theksoi se për Kosovën dhe Malin e Zi, si dy vendet e vetme të rajonit që kanë zgjedhur Euron si valutë të tyre, tema e këtij paneli është edhe më e rëndësishme, sipas tij për shkak të fushëveprimit të kufizuar për të korrigjuar gabimet në menaxhimin e financave publike nëpërmjet masave monetare.

Hoti shtoi se financat publike të shëndetshme dhe niveli i ulët i borxhit publik kanë efekt të menjëhershëm në pasigurinë ekonomike dhe rrjedhimisht në rritjen ekonomike.

Hoti tha se Kosova është shembull konkret se si reformat në financat publike kanë pasur ndikim të menjëhershëm në rritjen ekonomike, duke rezultuar me një përshpejtim të normës së rritjes nga 1.2% më 2014 në një mesatare prej 4% përgjatë 2015 dhe 2016.

Ai bëri të ditur se përmirësimet kryesore në arkën e shtetit kanë rezultuar nga rënia e deficitit buxhetor dhe ngritja e të hyrave tatimore nga 21% në 24% të prodhimit të brendshëm bruto./AktivPress