Haradinaj ua prezanton amerikanëve projektin për Qytetin Ekonomik Kosovaro – Amerikan

5 muaj më parë

Haradinaj ua prezanton amerikanëve projektin për Qytetin Ekonomik Kosovaro – Amerikan

Kryeministri i Kosovës, Ramush Haradinaj, ka pritur në takim, Frank Cownie, Kryetar i Des Moines, Iowa të cilit ia prezantoi projektin për Qytetin Ekonomik Kosovaro – Amerikan, transmeton AktivPress.

Me këtë rast, Haradinaj ka njoftuar Cownie-n, për “prioritet e Qeverisë në zhvillimin ekonomik, hapjen e vendeve të reja të punës, për mundësitë që ofron Kosova për investimet e huaja, veçmas ato nga Shtetet e Bashkuara të Amerikës”.

Duke falënderuar Shtetet e Bashkuara të Amerikës për mbështetjen e parezervë të Kosovës, në të gjitha fazat e shtetndërtimit, ai tha se në këtë fazë të konsolidimit ndërkombëtar të shtetësisë, Qeveria e Kosovës është e përkushtuar në zhvillimin e qëndrueshëm ekonomik, hapjen e vendeve të reja të punës dhe tërheqjen e investimeve të huaja.

Haradinaj më tej shtoi se “Qeveria e Kosovës ka ndërmarrë hapa konkret në lehtësimin e procedurave dhe legjislacionit për investitorët e huaj potencial, si Ligjin për Investime Strategjike dhe një sërë lehtësirash tatimore, që i hapin rrugë investimeve të huaja”.

“Përcaktimi ynë, për një miqësi dhe partneritet të përjetshëm me ShBA-të, po dëshmohet çdo herë e më shumë me projekte konkrete, siç është edhe Qyteti Ekonomik Kosovaro – Amerikan, për të cilën Qeveria po punon në vazhdimësi për ta shndërruar në storie suksesi për zhvillim ekonomik të vendit dhe vlerë të shtuar të partneritetit tonë”, tha kryeministri Haradinaj.

Me qëllim të thellimit të bashkëpunimit ekonomik dhe tërheqjes së investimeve nga ShBA-të, ai tha se Qyteti Ekonomik Kosovaro – Amerikan, është një mundësi e mirë për ofrimin e kushteve të nevojshme për investimet e kompanive të ndryshme nga Shtetet e Bashkuara të Amerikës.

Nga ana e tij Frank Cownie, Kryetar i Des Moines, nga Iowa, vlerësoi bashkëpunimin ndërmjet Iowa-s dhe Republikës së Kosovës, duke thënë se ky bashkëpunim do të vazhdojë në fusha të ndryshme, si ekonomi, edukim, siguri dhe fusha tjera të interesit të përbashkët./AktivPress/